"Alma"









Alma from Rodrigo Blaas on Vimeo.


Esta curta foi escrita e dirixida por Rodrigo Blaas. Este granadino traballa en Pixar desde o 2002 e participou en películas como Buscando a Nemo, Cars, Os incribles, Wall-e e UP.

"O achado do castro"

Un verdadeiro achado foi para os integrantes do noso grupo de 3º da ESO a peza teatral "O achado do castro" de Manuel Núñez Singala. A lectura dramatizada da obra fixo que os nosos clubeir@s escachasen coa risa. Para que logo digan que ler non é divertido.

Esperamos seguir a saborear o humor desta primeira xuntanza na seguinte.

Visita á FUNDACIÓN X. NEIRA VILAS

Xosé Neira Vilas recibiu o noso club de lectura na súa Fundación.


Foi unha oportunidade para departir con el sobre a súa vida e a súa obra. En concreto, Memorias dun neno labrego, fixo que lle lembrase ó noso alumnado as condicións da infancia de antano, o pouco acceso á educación que se tiña naquela época e o feito de que para poder ir á escola tivese que andar varios quilómetros a pé por camiños intransitables.


Tamén lles serviu de guía para amosarlles moitas das pezas de carácter etnográfico que garda na súa Fundación, así como a súa voluminosa biblioteca.


Aproveitamos esta xornada para coñecer de preto a comarca onde se sitúa a Fundación. Primeiro visitamos o Pazo de Oca. Despois percorremos a rota para chegar á fervenza do Toxa e á praia fluvial da Carixa, en Merza. Por último, achegámonos á nosa cita co escritor en Gres e visitamos as illas que se atopan no río e a súa ponte romana.

"Mundo Arb"



Comezamos o curso con importantes novidades. Temos un novo grupo en 2º da ESO, nel estamos xa coa nosa primeira lectura. Trátase da novela gañadora do premio Barco de Vapor 2010.

Mundo Arb de Manuel Lourenzo González. Se pinchas no enlace podes acceder ó primeiro capítulo.

UNHA LIBRERÍA PARA SOÑAR



Na librería Lello e Irmão, en O Porto (Portugal), rodáronse escenas da película de Harry Potter.

"Chocolata" en Brasilia






Nenos e nenas de Brasilia realizaron unha curta de animación audiovisual co conto ‘Chocolata’. (Obradoiro de OQO editora no Instituto Cervantes desta cidade brasileira, con motivo da celebración do Día Cervantino da Literatura Infantil e Xuvenil

Vídeo-homenaxe "Memorias dun neno labrego"




O alumnado do Club de lectura e de diversificación participou nesta gravación de vídeo que homenaxea o libro de Neira Vilas, Memorias dun neno labrego.


Durante a actividade recitaron anacos literais deste libro e relataron as distintas aventuras que lle acontecen a Balbino.

QUERIDO BALBINO. 1961-2011. Cincuenta anos de "Memorias dun neno labrego"


Ver catálogo da exposición.


Estes días na Biblioteca Pública de Pontevedra podemos contemplar esta exposición que recolle fotografías, vídeos e correspondencia que permiten coñecer a traxectoria vital de Neira Vilas e de Memorias dun neno labrego, o libro máis lido da literatura galega. Exhíbense ademais 10 traballos de pintores galegos que renden a súa particular homenaxe á obra protagonizada por Balbino.

Memorias dun neno labrego é o libro máis lido da historia da literatura galega e tamén o máis traducido a outros idiomas (contabilízanse unha vintena de traducións), ademais da novela a través da que moitos lectores se inicaron na lectura en lingua galega.


O noso club visitará a Fundación Neira Vilas na saída que ten prevista como remate as actividades deste ano o derradeiro día de clase.

"Memorias dun neno labrego"

Esta é a nosa derradeira lectura no Club deste ano, "Memorias dun neno labrego". Serviunos para achegarlles unha realidade rural que a algúns lles queda algo alonxada, pero da que aínda se albiscan retallos hoxe, sobre todo no entorno dos nosos rapaces.


Falamos de como era antes o rural galego, da escola, dos mestres, dos curas, do señor, do xudeu. Tratamos o tema de emigración, moitos dos integrantes do noso club aínda teñen ou tiveron familiares emigrantes. Achegámonos, tamén, a outros temas, como o primeiro amor ou os nosos animais de compañía a través do Pachín do Balbino.


Con nós, Marcos Calveiro

O pasado 19 de maio estivo no noso club de lectura o escritor Marcos Calveiro para explicarnos algunhas cousas sobre a súa obra O pintor do sombreiro de malvas. Comezamos a sesión co visionado dunha presentación dos cadros que inspiraron esta obra. Algúns deles xa os consultaramos seguindo os pasos do pintor, pero este que reproduce un rapaz non, e foi nel no que se inspirou para dar vida ó protagonista innominado da novela.








Os integrantes do noso club estiveron moi atentos ás explicacións do autor sobre algunhas incógnitas que deixa abertas a lectura desta novela, e comentaron as súas interpretacións sobre as personaxes e o final aberto da historia.

Tras os pasos do pintor no noso club




Despois de seguir a primeira sesión da lectura d'O pintor do sombreiro de malvas a través dos cadros de Van Gogh. Houbo un descanso para a merenda e celebración do Entroido grazas as achegas feitas polas nais e por algunha das nosas integrantes do club.

Máis d' "O pintor do sombreiro de malvas"



Achegamos novos recursos para traballar O pintor do sombreiro de malvas

Desde o blog "Trafegando ronseis": 24/02/10 "Crónica dunha viaxe.
Polo Antroido viaxamos cara as terras de Val d’Oise, departamento próximo a París que acolle un conxunto de paisaxes naturais.(...)

Nun dos días de andaina, o noso anfitrión levounos a unha vila chamada Auvers-sur-Oise, onde se atopa un fermoso castelo, a casa do doutor Gachet e, alén doutras moradas, o museo do asente, licor preferido dos artistas de finais de século XIX (feito a partir dun preparado de plantas entre as que se atopa a Artemisa absinthium), utilizado tamén con fins terapéuticos e que daría para outra historia distinta a que refiro.

A vila de Auvers-sur-Oise é famosa por acoller no camposanto as tumbas dos irmáns Vincent e Théo van Gogh. Auvers-sur-Oise foi un dos lugares favoritos de numerosos artistas como Cézanne, Pisarro, Sisley, Monet e o devandito Vincent van Goth, seica seducidos polo carácter rústico e pintoresco da vila…

A min chamoume a atención todo canto escribo, e ver como na praza de “la Mairie” (do Concello), ao mediodía, un home de voz forte e profunda, le crieur public (que eu traduzo como “berrón público”), sobre un caixón, contaba historias de amor, denuncias, venda de obxectos, chistes, poemas… Escoitabamos aquel home na compaña de moitas máis persoas, algúns foráneos coma nós, outros, os máis, veciños e veciñas da vila; e a cada intre aplaudiamos o recitar dos textos…

Logo de facer parada nun café, chamado “Sous le Porche”, descubrín de certo a historia: desde hai tres anos, cada domingo ao mediodía, na praza do concello de Auvers-sur-Oise, le crieur public grita as mensaxes e anuncios que os veciños da vila redactan nas follas que se atopan a disposición do público no citado café e que deben depositar con antelación nunha caixa azul situada á porta do mesmo, polo módico prezo de 1€ cada mensaxe. Seica as de amor son gratuítas, pois como aseguran nos folletos explicativos: “as mensaxes de amor non teñen prezo”.

Pensei na Galiza, nas prazas dos concellos das nosas vilas, en que ben poderiamos nomear un crieur public para cada unha delas, e aos domingos ao mediodía, todos os domingos do ano, berrar sen desmaio poemas de amor pola nosa terra, protestas contra dos que queren que sexamos plurilingües e reneguemos da nosa lingua, anuncios de cousas alegres, denuncias dos parlamentarios que se apropian do indebido e din que son disfuncións, contos do pasado e do presente… E todos poderiamos escribir de vez en cando algunha historia para contar e todos iriamos a escoitar ao crieur public ao mediodía dos domingos, e sería o lugar e a hora de conversa dos veciños, tan escasa nos tempos que están a correr… e quen sabe?... Se cadra este sería o xeito de sermos máis nós."

Desde o IES de Poio e o seu Club "Os trasnos dos libros":


Cuestionario d' O PINTOR DO SOMBREIRO DE MALVAS.



Cuestionario guía para o club de lectura d’ O pintor do sombreiro de malvas.
(Nota previa: todas as cuestións procuran unha resposta baseada na lectura da novela.)

1.Na novela, o narrador ocupa boa parte do seu tempo no gozo de ler.Relaciona as obras obxecto de lectura. Analiza a valoración que a sociedade descrita na obra ten das lecturas que se citan e da xente que le. [Para empezares, bótalle unha ollada ás páxinas 14, 26, 39 e 156.]

2.¿Quen narra a historia? ¿Cal é o punto de vista adoptado na novela?

3.¿En que época se ambienta a novela? ¿Cales son as características máis salientables desa época?

4.O título da novela é anecdótico.Explícao. 5.Quen vén sendo o pintor do que se fala na obra?

6.¿Podes establecer unha relación entre a personalidade do pintor e a técnica pictórica que emprega? [Véxanse pp. 20-21, 28 e 73.]

7.Despois da lectura da novela, ¿como dirías que anda a cabeza do pintor Vincent?

8.No contexto da obra, ¿que valor ten a expresión “A tristura non rematará xamais” (pp. 167, 173).

9.Se contrastas a biografía do pintor coa figura que del se dá na novela, ¿temos a mesma imaxe do personaxe?

10.Analiza a figura do sacerdote.

11.Analiza a relación narrador-Adeline.

12.¿Dáse na obra outra relación que representa o contrapunto da anterior? ¿Quen son os protagonistas? Compáraa coa anterior.

13.Como lector, ¿consideras que queda algunha liña argumental sen desenvolver?

14.¿Que decisión vital toma o protagonista-narrador?

15.Por certo, ¿como se chama o protagonista-narrador? ¿Que recursos se utilizan para dirixirse a el?

16.Describe o proceso de deterioración psicolóxica do pintor.

17.¿En que modo inflúe a pintor na madurez do protagonista-narrador?

18.¿Pode dicirse que a novela describe a confrontación de dous mundos? ¿Cal é a túa opinión ó respecto?

19.¿De que outros pintores se fala na obra? ¿Teñen algunha relación co noso pintor? [Véxanse pp. 47, 80, 105.]

Vía Revolta da freixa.

"La Bruxa"

LA BRUXA from lafiestapc on Vimeo.

"O pintor do sombreiro de malvas"



Esta é a nosa segunda lectura do club deste ano. Será obxecto da nosa vindeira xuntanza ata o capítulo 21 incluído.

Algúns personaxes das historias de medo na CULTURA POPULAR GALEGA

A través deste traballo do IES de Rodeira (Cangas) reflexionaremos na xuntanza da vindeira semana sobre o tema dos lobos e lobishomes da nosa lectura Pel de lobo.